1Th 1 | GAM | STEP | Nono Nane God ne Iwa Kerman Jisas Krais pillgi djinj una dumo Tesalonaika ye mor ge, no Pol ne Sailas ne Timoti pepa bolo ye aunmon. God ye wandill golo aundaka ye ellne tukne arngan yenda moye.

1 Thessalonians 1

1 Nono Nane God ne Iwa Kerman Jisas Krais pillgi djinj una dumo Tesalonaika ye mor ge, no Pol ne Sailas ne Timoti pepa bolo ye aunmon. God ye wandill golo aundaka ye ellne tukne arngan yenda moye.

Dumo Tesalonaika una pillgi dji ge Pol wopake pi

2 Ege ege no ye pille God wopake we dje aunmon. Kamang yemon ge, no ye kandjine eri darmon. 3 No ye pille nono Nane God moro al wopake we dje aunmon. Ye pillgi dje kogo yenj mal ne, ye una kane wopake kane kogo dongall yenj mal ne, ye nono Iwa Kerman Jisas Krais yem wonda dje kui ye mor mal ge, no wopake we dje Nane God aunmon. 4 Agana ambana kambono God ye wopake kani una mor ge, une ye dje i mor mal ge no pille kane yenmon. 5 Krais kandjiyembe wopake no ye dje aupin ge no kandjine man. God Murble wopake ne, yembe dongall boll paika, no pillgi dongall djipin ge ye kani. Krais kandjiyembe wopake ye boll woi. Alla no ye boll ami dje molo ye pille kogo yepin mal ge ye kaninj. 6 Ye God kandjiye pille i pakna woro imb kerman kaki. Ba God Murble ye boll moika, ye wo pille, no singare yepin mal karkar ye molo Iwa Kerman yendo mal karkar yei. 7 Ye singare wopake embe yei ge ye ombine mal dje awi, pillgi pai una propins Masedonia ne Akaia moi ge kani. 8 Ye Iwa Kerman kandjiye dje una awinj ge yau kerman dal tonjka pir. Dumo Masedonia ne Akaia eri man, dumo yom yom mor ge ye pillgi djinj mal pille kane ye keri. No kandja ge are ta djimbon naparo. 9 Ga kandjambe toi pupin. Ye no djembon to awi mal ne, ye god kende kere er God kaima gun moro al wo une kogoye yenj ge ne, 10 une Warye Jisas goi i gun wori, une nono elle kumbso awo tonda pai ba, Jisas ge, nono i yom wori pille wopake mopon. Iwa ge kupill al kere er kal wonda dje ye kui ye mor mal ge una djinj pirmon.